( ត្បូងឃ្មុំ ): លោក គន់ រ័ត្នមុនី អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានដឹកនាំក្រុមការងារចម្រុះចុះពិនិត្យទីតាំងផ្ទាល់ នៅតំបន់ត្រពាំងក្រម ស្ថិតក្នុងស្រុកមេមត់ ខេត្តត្បូងឃ្មុំ នារសៀលថ្ងៃទី ៦ ខែកុម្ភៈ ឆ្នាំ ២០២៦ ក្នុងគោលបំណងរៀបចំផែនការឱ្យបានហ្មត់ចត់ សម្រាប់ “ពិធីចាប់ត្រីបែបបុរាណ” សំដៅធានាសន្តិសុខ សណ្តាប់ធ្នាប់ និងសុវត្ថិភាព ជូនភ្ញៀវទេសចររាប់ម៉ឺននាក់ ដែលនឹងមកចូលរួមចាប់ត្រីនាថ្ងៃទី ១៤ ខែកុម្ភៈ ខាងមុខនេះ ដើម្បីថែរក្សានូវទំនៀមទម្លាប់ប្រពៃណីដ៏ល្អផូរផង់របស់ដូនតា និងបង្កលក្ខណៈសប្បាយរីករាយជូនប្រជាពលរដ្ឋ ។

លោក គន់ រ័ត្នមុនី បានយកចិត្តទុកដាក់ខ្ពស់លើកត្តាសំខាន់ៗចំនួន ៣ រួមមាន ស្ថានភាពធនធានធម្មជាតិ ពិនិត្យកម្ពស់ទឹក និងបរិមាណត្រីក្នុងត្រពាំង ដើម្បីធានាថាការកម្សាន្តរបស់ពលរដ្ឋប្រព្រឹត្តទៅដោយភាពរីករាយ និងសម្បូរបែប សន្តិសុខ និងសណ្តាប់ធ្នាប់ រៀបចំផែនការការពារសុវត្ថិភាពជូនភ្ញៀវទេសចរជាតិ និងអន្តរជាតិ ដែលរំពឹងថានឹងមកចូលរួមយ៉ាងកុះករ និងហេដ្ឋារចនាសម្ព័ន្ធបម្រើការកម្សាន្ត ការរៀបចំចំណតយានយន្តឱ្យមានរបៀបរៀបរយ និងការរៀបចំបន្ទប់ទឹកអនាម័យ ដើម្បីផ្ដល់ភាពងាយស្រួលបំផុតដល់សាធារណជន ។

លោកអភិបាលរងខេត្ត បានសង្កត់ធ្ងន់ទៅលើការរក្សាឱ្យបាននូវទម្រង់ដើមនៃ “ការចាប់ត្រីបែបបុរាណ” និងបានណែនាំដល់អាជ្ញាធរ រួមជាមួយកងកម្លាំង ត្រូវហាមឃាត់រាល់ការប្រើប្រាស់ឧបករណ៍នេសាទទំនើប ឬឧបករណ៍ល្មើសច្បាប់ផ្សេងៗ ហើយអ្នកចូលរួមទាំងអស់ អនុញ្ញាតឱ្យប្រើប្រាស់តែឧបករណ៍ដែលច្នៃពីឫស្សីតាមបែបបុរាណប៉ុណ្ណោះ រួមមាន អង្រុត ឈ្នាង ទ្រក ដើម្បីបង្ហាញពីតម្លៃនៃវប្បធម៌ និងការរស់នៅចុះសម្រុងជាមួយធម្មជាតិរបស់ដូនតាខ្មែរ ។

សូមបញ្ជាក់ថា “ត្រពាំងក្រម” គឺជាតំបន់ប្រវត្តិសាស្ត្រធម្មជាតិដ៏សំខាន់មួយក្នុងស្រុកមេមត់ ដែលមានផ្ទៃជម្រាលប្រមូលទឹកដល់ទៅ ៣០ ហិកតា និងមានត្រពាំងតូចៗជាសាខាចំនួន ២០ ទៀត ។

តំបន់នេះសម្បូរទៅដោយរុក្ខជាតិលិចទឹក ដែលជាជម្រកត្រីធម្មជាតិយ៉ាងល្អប្រសើរ ហើយជារៀងរាល់ឆ្នាំ ឱ្យតែដល់ខែកុម្ភៈ ប្រជាពលរដ្ឋតែងតែរៀបចំពិធីនេះឡើង ដើម្បីចាប់ត្រីយកមកចម្អិនអាហារហូបជុំគ្នា បង្កើតបានជាបរិយាកាសសាមគ្គីភាព និងភាពសប្បាយរីករាយយ៉ាងក្រៃលែង ។

ពិធីចាប់ត្រីបែបបុរាណនៅត្រពាំងក្រម មិនត្រឹមតែជាព្រឹត្តិការណ៍កម្សាន្តប៉ុណ្ណោះទេ ប៉ុន្តែវាក៏ជាការដាស់តឿនដល់កូនខ្មែរជំនាន់ក្រោយ ឱ្យរួមគ្នាថែរក្សាមរតកវប្បធម៌ និងធនធានធម្មជាតិឱ្យបានគង់វង្សតរៀងទៅ ៕