( ត្បូងឃ្មុំ ): ឆ្លងចរន្តអគ្គីសនីបង្ករជាអគ្គីសភ័យ ឆាបឆេះផ្ទះរាបដល់ដី និងទ្រព្យសម្បត្តិអស់រលីងគ្មានសល់ ខណ:ម្ចាស់ផ្ទះមិននៅ ។
ហេតុការដ៏សោកស្ដាយ ១ នេះ កើតឡើងកាលពីវេលាម៉ោង ១៩ យប់ថ្ងៃទី ១០ ខែកញ្ញា ឆ្នាំ ២០២៥ ស្ថិតនៅក្នុងភូមិអំពិល ឃុំប៉ើស ២ ស្រុកក្រូចឆ្មារ ខេត្តត្បូងឃ្មុំ ។
ប្រជាពលរដ្ឋនៅកន្លែងកើតហេតុបានឲ្យដឹងថា ខណ:កើតហេតុភ្លាមៗ អ្នកជិតខាងក្នុងភូមិ បាននាំគ្នាបូមទឹកបាញ់ពន្លត់ភ្លើងដែរ តែមិនអាចគ្រប់គ្រងស្ថានការបាននោះទេ ។
នគរបាលនៃអធិការដ្ឋានស្រុកក្រូចឆ្មារបានឲ្យដឹងនៅថ្ងៃទី ១១ ខែកញ្ញា ឆ្នាំ ២០២៥ ថា ផ្ទះដែលឆេះនេះ គឺសង់ពីឈើ ប្រក់ដែក ជញ្ជាំងក្ដារទំហំ ៦ ម៉ែត្រ គុណ ១២ ម៉ែត្រ ម្ចាស់ផ្ទះឈ្មោះ យ៉ាន់ ថា ភេទប្រុស អាយុ ៥៦ ឆ្នាំ ជនជាតិខ្មែរ ។
សមត្តកិច្វបន្តថា ម្ចាស់ផ្ទះបិទទ្វារចាក់សោរ ហើយទៅផ្ទះមួយទៀត នៅឯឃុំរកាខ្នុរ ដែលឆ្ងាយពីគ្នាជិត ១០ គីឡូម៉ែត្រ រីឯគ្រោះអគ្គិភ័យនេះ កម្លាំងជំនាញបានប្រើប្រាស់រថយន្តពន្លត់អគ្គិភ័យ ១ គ្រឿង និងប្រើប្រាស់ទឹកអស់ ២ រថយន្ត ទើបគ្រប់គ្រងស្ថានការណ៍បានទាំងស្រុង មិនឆេះរាលដាលដល់ផ្ទះអ្នកដទៃ ។
សមត្ថកិច្ចបញ្ជាក់ទៀតថា ចំពោះទំហុំនៃការខូចខាត គឺផ្ទះឆេះអស់ទាំងស្រុង ឆេះម៉ាស៊ីនបូមទឹក ២ គ្រឿង ទូរទឹកកក ១ ម៉ាស៊ីនបោកខោអាវ ១ ទូរទស្សន៍ ១ ស្រូវ ១៥ បេ និងសម្ភារ:ប្រើប្រាស់ផ្សេងៗមួយចំនួនធំទៀត ៕
